Gilugwayan pag-usab ang deadline sa pag renew sa Tricycle Operator’s Permit (MTOP) ug pagbayad sa buhis, mga balayronon nga walay silot o penalty ug mga surcharges gikan sa May 31, 2021 hangtod June 30, 2021 para sa tanang operator og motorized tricyles-for-hire sa siyudad sa Tagbilaran. Kini human gi-aprobahan ang Resolution No. 21-74 sa mga miyembro sa 14th Sangguniang Panlungsod nga gipangulohan ni Bise-Mayor Toto Veloso karong adlawa, petsa May 28, 2021 atol sa ilang regular session.Kini human nga miatubang ug mihangyo ang mga Tricycle Operators and Drivers Association (TODA) Presidents ngadto sa mga miyembro sa konseho sa Tagbilaran sa niaging semana nga ipalugway pag-usab ang deadline sa renewal tungod kay kadaghanan sa mga tricycle operators ug drivers, igo ra ang ilang kita sa ilang pangkonsumo. Matod nila, tungod sa COVID-19 pandemic, tag-isa ra ka pasahero ang ilang pasakyon nga niresulta sa ilang gamay nga kita ug dili pa nila makaya ang pagparenew sa ilang MTOP ug uban pang bayronon.